NAIBU WAZIRI KWAGILWA AAGIZA TSC KUHAKIKISHA UWIANO SAWA WA WALIMU NCHINI
Naibu Waziri, Ofisi ya Waziri Mkuu (TAMISEMI), Mhe. Reuben Kwagilwa, ameielekeza Tume ya Utumishi wa Walimu (TSC) kuhakikisha kuwa kunakuwepo na uwiano sahihi wa usambazaji wa walimu katika Serikali za Mitaa na shule zote nchini, ili kila mtoto apate elimu bora bila kujali eneo analoishi.
Akizungumza tarehe 25 Novemba 2025 wakati alipokutana na Wajumbe wa Tume, Menejimenti na Watumishi wa Tume hiyo, Mhe. Kwagilwa alisema hatua hiyo ni muhimu katika kuondoa tofauti zilizopo kati ya shule zenye walimu wengi na zile zenye walimu wachache.
“Katika kutekeleza jukumu lenu la kusimamia na kuendeleza utumishi wa walimu, hakikisheni kunakuwepo kwa uwiano mzuri katika shule zetu. Tusiendelee kuwa na shule za mijini zikiwa na walimu wengi huku shule za vijijini zikiwa na upungufu mkubwa,” alisisitiza.
Ameongeza kuwa wakati wa kampeni, Rais wa Jamhuri ya Muungano wa Tanzania, Mhe. Dkt. Samia Suluhu Hassan, aliahidi kuajiri walimu 7,000 ndani ya siku 100 ili kuboresha elimu, ikiwemo kutekeleza mkakati wa kuhakikisha kila mwanafunzi wa darasa la tatu anaweza kusoma, kuandika na kuhesabu bila changamoto.
Aidha, Naibu Waziri ameitaka Tume kufanya utafiti na tathmini ya kina kuhusu mahitaji halisi ya watumishi wa sekta ya elimu, ili kuishauri Mamlaka ya Ajira juu ya idadi, aina na ngazi za walimu wanaohitajika katika maeneo mbalimbali.
Katika hatua nyingine, Mhe. Kwagilwa ameiagiza Tume kuhakikisha kuwa mashauri yote ya kinidhamu na kiutumishi yanamalizika katika ngazi ya Tume, kwa kuzingatia misingi ya haki, uwazi na uadilifu.
Awali, Katibu wa Tume ya Utumishi wa Walimu, Mwl. Paulina Nkwama, akiwasilisha taarifa ya utekelezaji wa majukumu ya Tume, alisema TSC inasimamia jumla ya walimu 289,984, wakiwemo walimu 186,207 wa shule za msingi na walimu 103,777 wa shule za sekondari.
Aidha, kuhusu kupandisha vyeo, Mwl. Nkwama alisema kuwa kwa mwaka 2024/2025, jumla ya walimu 97,992 walipandishwa vyeo— kati yao 61,679 ni wa shule za msingi na 36,313 ni wa sekondari. Aliongeza kuwa mwaka 2023/2024, walimu 158,916 walipandishwa vyeo, huku mwaka 2022/2023 walimu 65,925 wakipandishwa vyeo.
