NAIBU WAZIRI KWAGILWA ATEMBELEA MRADI WA UJENZI WA JENGO LA TSC, AAGIZA SUMA JKT KUKAMILISHA KWA WAKATI
Naibu Waziri, Ofisi ya Waziri Mkuu Tawala za Mikoa na Serikali za Mitaa (TAMISEMI), Mhe. Reuben Kwagilwa tarehe 25 Novemba, 2025 ametembelea mradi wa ujenzi wa jengo la Ofisi ya Tume ya Utumishi wa Walimu (TSC) Makao Makuu unaojengwa katika eneo la Njedengwa jijini Dodoma na kutoa agizo kwa mkandarasi SUMA JKT kuhakikisha anakamilisha mradi huo ndani ya muda wa nyongeza waliouomba.
Akizungumza mara baada ya kukagua mradi huo, Mhe. Kwagilwa alisema kuwa mkandarasi anatakiwa kutumia vyema muda wa nyongeza wa miezi sita aliouomba pamoja na marekebisho mengine ya mkataba yanayolenga kuongeza kasi ya ukamilishaji wa ujenzi huo na kuongeza kuwa Serikali inatarajia ujenzi huo kukamilika kama ilivyopangwa bila kusababisha ucheleweshaji mwingine.
Aidha, aliielekeza Tume ya Utumishi wa Walimu kufanya vikao na mkandarasi kila mwezi ili kujadili changamoto na kufuatilia maendeleo ya mradi.
Akitoa taarifa ya ujenzi kwa niaba ya SUMA JKT, mwakilishi wa mkandarasi alisema kuwa mradi umefikia asilimia 70. Alifafanua kuwa kazi zilizokamilika ni pamoja na ujenzi wa msingi, kusimamisha kuta kutoka ngazi ya chini hadi hatua ya kuezeka, ufungaji wa paa, ujenzi wa kuta (block works), upigaji lipu zaidi ya asilimia 50, pamoja na ufungaji wa fremu na grill za madirisha.
Awali, Katibu wa Tume ya Utumishi wa Walimu, Mwl. Paulina Nkwama alisema kuwa mradi huo una thamani ya shilingi bilioni 6.4 na ulipaswa kukamilika ndani ya miezi 18. Alisema kuwa hadi sasa kiasi cha shilingi bilioni 2.8 kimelipwa sawa na asilimia 44.27 ya thamani ya mkataba.
Mwl. Paulina alisema kuwa mkandarasi amewasilisha ombi la kufanya marekebisho ya mkataba pamoja na kuongezewa muda wa kukamilisha mradi ambapo ameongezewa muda hadi tarehe 1 Juni 2026.
